Нарықтағы бәсекелестердің түрлері

Нарықтағы бәсекелестердің түрлері. Бәсекелестердің үш негізгі түрі бар. Бірінші түрі — тікелей бәсекелестер. Бұл — сіз жасап жатқан өнімге ұқсас немесе өте жақын өнімдерді ұсынатын компаниялар. Мысалы, Яндекс, Wolt, Glovo сияқты тамақ жеткізу сервистері. Жанама бәсекелестер — бәсекелестердің екінші түрі. Бұл — клиенттердің сол қажеттіліктерін қанағаттандыра алатын балама шешімдерді немесе өнімдерді ұсынатын компаниялар. Мысалы, тамақ жеткізу мобильді қосымшасын ұсынатын стартап үшін жанама бәсекелестер мейрамханалар, супермаркеттердегі дайын тағам немесе тіпті үйде өз бетінше тамақ дайындау болуы мүмкін.

Бәсекелестердің үшінші түрі — жасырын бәсекелестер. Бұл — дәл сондай өнімді немесе қызметті ұсынбайтын, бірақ клиенттердің ресурстары, назары және уақыты үшін бәсекелесетін компаниялар немесе брендтер. Мысалы, бейне ойындар ұсынатын стартап үшін әлеуетті клиенттердің назары мен уақытын тарта алатын әлеуметтік желілер немесе онлайн-ойын-сауықтың басқа түрлері жасырын бәсекелестер болуы мүмкін. Нарықтағы бәсекелестерді қалай анықтауға болады? Бәсекелестерді талдау кімнің кімге, қандай бағамен және қандай тауар немесе қызмет сататынын көрсетеді. Негізгі мақсат — нарықтың жай-күйі, тауашаның ерекшеліктері, бәсекелестер және олардың күшті және әлсіз жақтары туралы деректер жинау. Нарықтағы бәсекелестерді анықтау үшін келесі әдістер мен құралдарды пайдалануға болады.

Біріншісі, әрине, нарықты зерттеу. Екіншісі — интернеттегі зерттеу. Іздеу жүйелерін, әлеуметтік желілерді және мамандандырылған платформаларды пайдаланып, сіздің салаңызда жұмыс істейтін компаниялар туралы ақпарат іздеңіз. Олардың веб-сайттарын, әлеуметтік желілерін, блогтарын, клиенттердің пікірлерін зерделеңіз. Жалпы, цифрлық ізі бар барлық нәрсені. Үшіншісі — нарықтағы үлесті талдау. Сіздің салаңыздағы компаниялардың нарықтағы үлесі туралы есептер мен деректерді зерделеңіз. Қандай компаниялар көшбасшы екенін және нарықтың үлкен үлесіне ие екенін біліңіз. Төртіншісі — клиенттерді талдау. Бәсекелестердің клиенттер базасы мен мақсатты аудиториясына назар аударыңыз.

Олардың клиенттерді тарту және, ең бастысы, ұстап қалу үшін қандай стратегияларды қолданатынын біліңіз. Бәсекелестер салаға және географиялық аймаққа байланысты әр түрлі болуы мүмкін екенін есте сақтаңыз, сондықтан бизнесіңізді тиімді позициялау үшін нарыққа тұрақты мониторинг жүргізіп, бәсекелестеріңізді талдап отыру ұсынылады.