IT-стартаптар. 2024 жылғы Қазақстан мен әлемнің үздік жобалары
Үздік стартаптар — адамдарды өз ісін ашуға шабыттандыратын және әр елдің технологиялық даму жолындағы ілгерілеуін көрсететін пайдалы «табыс тарихтары». Бұл мақалада 2024 жылы Қазақстанда және шетелде жаңа технологиялар саласындағы қандай жобаларды бақылаған жөн екенін айтамыз.
Мазмұны:
Қазақстанның қызықты IT-стартаптары
EasyTap
EasyTap — 2021 жылдың қарашасында құрылған, дүкендер мен мейрамханаларға сағаттық негізде жұмыс істейтін қызметкерлерді іріктейтін онлайн-сервис. 2022 жылдың мамырында компанияның негізін қалаушылар Магзум Толеш пен Темирлан Кабылбеков 270 мың доллар көлемінде жеке инвестиция тартты. Инвесторлар қатарында — Activat VC венчурлік компаниясы және осы нарықтың басқа да ірі ойыншылары.
Сервис бизнеске қатардағы қызметкерлерді табуға көмектесіп, жұмыс күші тапшылығы мәселесін шешеді. Ал орындаушылар ыңғайлы кестемен және апта сайын жалақы төленетін жылдам қосымша жұмыс табады. Қосымшаны қазірдің өзінде Қазақстанның түрлі қалаларында 150 мыңнан астам адам пайдаланады, сервис Қырғызстан нарығына да шықты.
ApartX
ApartX — пәтерлерді ыңғайлы түрде жалға беруге және оларды «ақылды» құлыптар арқылы бақылауға арналған сервис. Стартаптың негізін қалаушылардың айтуынша, осының арқасында пәтер жалдау нарығы ашығырақ бола түседі. ApartX-тің жалдау нарығындағы жұмысқа жаңаша көзқарасы жылжымайтын мүлік иелерінің назарын аударып, пайдаланушылардан оң пікірлер алды. 2023 жылы стартап командасы кезекті қаржыландыру раундын жауып, Big Sky Capital қорынан 200 мың доллар және Activat VC компаниясынан 50 мың доллар сәтті тартты.
CTOgram
Пайдаланушылар арасында танымал тағы бір қызықты стартап — көлік иелеріне техникалық қызмет көрсету станцияларын және қосалқы бөлшектерді тікелей жеткізушілерден табуға көмектесетін CTOgram мобильді қосымшасы. Өткен жылы жүйеде 250 мыңнан астам көлік иесі және 2 мыңнан астам сервис тіркелді. Өткен жылдың жазында компания инвестор Тимур Турловтан жаңа қаржыландыру раундын тартты: сомасы 1,5 млн долларды құрады, ал стартаптың бағалау құны 13,5 млн долларға жетті.
Citix
Citix — Smart City және AdTech салаларында жұмыс істейтін қазақстандық стартап. Ол өз өнімінде «ақылды қалалар» технологиялары мен сыртқы жарнама саласындағы инновацияларды біріктіреді. Компания Қазақстан бойынша көшедегі гаджеттер желісін салып үлгерді және тіпті Түркия мен «MENA» (Таяу Шығыс және Солтүстік Африка) нарықтарына шықты. 2023 жылдың соңында америкалық бизнес-ангел стартапқа 1 млн доллар инвестиция салды, ал стартаптың бағалау құны 98 млн долларды құрады.
CodiPlay
CodiPlay — үшінші сыныптан он бірінші сыныпқа дейінгі оқушыларды мобильді ойындар арқылы Scratch, C++ және Python бағдарламалау тілдеріне үйретуге арналған сервис. Сонымен қатар стартап командасы мұғалімдердің IT-құзыреттерін арттыруға арналған «CodiTeach» платформасын әзірледі. 2023 жылы компания 2 млн доллар көлемінде инвестиция тартты және Қазақстан нарығында жұмыс істеп қана қоймай, Оңтүстік Корея, Өзбекстан және Әзербайжан нарықтарына шығуды жоспарлап отыр. Жалпы олардың өнімдерін Қазақстанның түкпір-түкпірінен 150 мыңнан астам пайдаланушы қолданады.
Шын мәнінде бұл тізімді шексіз жалғастыруға болады: Қазақстанда жыл сайын ондаған стартап пайда болады, олардың бәрі бірегей және инвестицияны сәтті тартып жүр. Олардың тарихы туралы қазақстандық медиапорталдардан, мысалы, Digital Business порталының стартаптар туралы арнайы бөлімінен толығырақ оқуға болады.
Әлемнің қызықты IT-стартаптары
Мұнда 2024 жылы бақылау қызықты болатын кейбір шетелдік IT-стартаптар туралы айтамыз.
AI21
AI21 — OpenAI-дың ең мықты бәсекелестерінің бірі, жасанды интеллектті көпшілікке алғашқылардың бірі болып енгізген компания; ол Google мен Nvidia сияқты осы саладағы кейбір ірі ойыншылардың назарын аударды. Амнон Шашуа, Йоав Шохам және Ори Гошен негізін қалаған, 1 млрд долларға бағаланған стартап жақында Intel қолдауымен өткен кезекті қаржыландыру раундында 208 млн доллар тартты.
Aleph Alpha
Aleph Alpha — Еуропаның OpenAI-ға жауабы ретінде қарастыруға болатын тағы бір стартап. Компания өзі «сенімге лайық» деп атайтын, кәсіпорындар мен мемлекеттерге арналған жасанды интеллект жасауды көздейді. Гейдельбергте орналасқан және 2019 жылы Йонас Андрулис негізін қалаған стартап жақында Innovation Park Artificial Intelligence жетекшілік еткен раундта 500 млн доллардан астам қаржы тартты.
Articul8
Articul8 Intel технологиялары негізінде жұмыс істейді және әлемге 2024 жылдың басында таныстырылды. Компанияның бұл тәуелсіз бөлімшесі кәсіпорындарға генеративті жасанды интеллекттің толық функционалды, вертикаль бойынша оңтайландырылған бағдарламалық платформасын ұсынады. Платформа жасанды интеллектті клиенттер туралы деректерді сақтау, модельдерді оқыту және нәтиже шығару үшін кәсіпорынның қауіпсіздік периметрі шегінде пайдаланады.
D-Matrix
D-Matrix компаниясы да назар аударуға тұрарлық жасанды интеллект саласындағы стартаптардың бірі екені сөзсіз. Жақында Temasek және Microsoft-тың M12 венчурлік қоры сияқты компаниялар 110 млн долларлық қаржыландыру раундында қолдау көрсеткен D-Matrix өз чиптері генеративті ЖИ жүйелерін қолдауға оңтайландырылғанын және Nvidia-мен бір салада бәсекелесетінін мәлімдейді.
ElevenLabs
2022 жылы құрылған ElevenLabs стартапы қазірдің өзінде «единорогқа» айналғанын мәлімдейді. Бұған қаңтарда Andreessen Horowitz, GitHub-тың бұрынғы бас директоры Нат Фридман және кәсіпкер Дэниел Гросс жетекшілік еткен 80 млн долларлық инвестиция раунды мүмкіндік берді. ElevenLabs пайдаланушыларға, соның ішінде Fortune 500 тізіміндегі компаниялардың қызметкерлеріне, әртүрлі тілдерде және әртүрлі акцентпен ЖИ дауыстарын жасауға және жобалауға көмектеседі.
Mistral
OpenAI мен Google-дың ЖИ нарығындағы үлесіне таласатын тағы бір еуропалық үміткер — желтоқсанда Andreessen Horowitz, Nvidia және Salesforce-тан 385 млн еуро көлемінде қаржыландыру раундын тартқаннан кейін «единорог» мәртебесін алған париждік Mistral компаниясы. Google, DeepMind және Meta компанияларының бұрынғы зерттеушілері негізін қалаған Mistral ашық бастапқы коды бар үлкен тілдік модельдер жасауға басты назар аударады.
Binalyze
Эстонияның киберқауіпсіздік саласындағы Binalyze стартапы компаниялардың инциденттерге ден қою уақытын қысқартқысы келеді. Таллинде орналасқан Binalyze компаниясы цифрлық криминалистика және инциденттерге ден қою (DFIR) саласына маманданған және Turkish Airlines, Deloitte пен EY компанияларын өзінің әлеуетті клиенттері деп санайды. Жақында компания Molten Ventures жетекшілік еткен раундта $19 млн инвестиция тартты.
Bolt
Bolt — электромобильдер қауіпсіздігіне инновациялық көзқарасымен мобильділік нарығында жақсы танымал, 2024 жылы бақылауға тұрарлық тағы бір стартап. Bolt алғаш рет 2020 жылдың желтоқсанында Ирландияда іске қосылып, қолданыстағы FreeNow және Uber қосымшаларымен бәсекелесу үшін такси шақыруға арналған өнімін ұсынды. Өткен жылдың наурызында компания сұраныстың өсуін күтіп, өзінің өңірлік схемаларына көбірек электр велосипедтерін тарту жоспарларымен бөлісті.
Build A Rocket Boy
Build A Rocket Boy — Grand Theft Auto ойынының бұрынғы әзірлеушісі Лесли Бензис негізін қалаған, бейнеойындар шығаратын шотландиялық компания. Ол ашық әлемі бар өз платформасын және MindsEye деп аталатын бейнеойындар сериясын іске қосуды жоспарлап отыр. Осы мақсатта Build A Rocket Boy тек қаңтарда ғана американдық RedBird Capital Partners жетекшілік еткен D сериялы раундта 110 млн доллар тартты.
Databricks
Databricks — бұл тізімдегі басқа стартаптарға да инвестиция салған жалғыз стартап болса керек әрі биыл назар аударуға әбден лайық. Сан-Францискода орналасқан компания машиналық оқыту мен аналитика қосымшаларын жасауға, тестілеуге және өрістетуге арналған жасанды интеллект бағдарламалық жасақтамасын шығарады. Жақында ол 500 млн доллардан астам қаржы тартты.
