Clash of Startups 2.0: финтехтегі ең қызу шайқас!

Қызықты, әдеттен тыс, бейресми: Activat VC іс-шарасы дәл осындай ұранмен дүркіреп өтті, оған қазақстандық финтехтің «акулалары» жиналды. Clash of Startups 2.0 аясында жетекші банктер мен венчурлік инвесторлар қаржы секторының стартаптарын бағалады. Ал стартаптар венчурлік нарықтың топ-өкілдерінен тиімді кері байланыс пен қуатты нетворкинг қана емес, сонымен бірге ең тәтті сый — жүлделер де алды. Іс-шараның серіктесі ретінде SmArt.Point ыңғайлы алаң ұсынды, ал ER10 Media ақпараттық қолдау көрсетті (және тек ол ғана емес!).

Activat VC атқарушы директоры Мейржан Есимханов питчингтегі «қызыл жалауларды» атап өтті — нарық көлемі мен трекшн сияқты инвестор үшін маңызды деректердің болмауы.

— Біз мәнерге қараймыз: питчинг әдемі әрі қызықты болуы керек, тең құрылтайшы аудиторияға арқасын бұрмауы және бүкіл презентацияны оқып шықпауы тиіс. Сондай-ақ стартапшы өзіне сұрақ қойылғаннан кейін абдырап қалмауы маңызды. Бұл оның өз стартапы туралы бірдеңені білмейтінін білдіреді, — деп толықтырды инвестор.

Мейржан көптеген стартаптардың өзін көрсетуіне жергілікті және көрші нарықтарға тұйықталып қалу кедергі келтіретініне назар аударды: «Единорог болу үшін үлкен әрі әсерлі тарих құруың керек. Өкінішке қарай, қазақстандық нарық шағын».

Бақытымызға орай, Clash of Startups «жасыл жалаулар» мен ауқымды жобалардың қазынасына айналды: 11 стартап FinTech-тің түрлі салаларындағы — киберқауіпсіздік пен AI-дан бастап клиенттерге қызмет көрсету мен логистикаға дейінгі идеяларын таныстырды. Олар Ұлттық Банкке арналған шешімдер жасайды және Қазақстан, Өзбекстан, Ұлыбритания, АҚШ пен БАӘ клиенттерімен жұмыс істейді. Олар сыртқы инвестициясыз ірі экожүйелер құрып, қарыздарды қайта құрылымдайды. Үздіктер атағы үшін шайқастың қаншалықты қиын болғанын елестету оңай шығар. Дегенмен жеңімпаздар анықталды. Қазылар алқасының құрамына мыналар кірді:

• Валерий Евловских – стартап-кеңесші, стартаптармен және инвесторлармен жұмыс істейтін американдық Grayver Law Group заң компаниясының операциялық директоры.
• Диас Кивенов, БЦК – Банк ЦентрКредит Басқарма Төрағасының мобильді қосымшаның IT-инфрақұрылымын дамыту жөніндегі кеңесшісі.
• Жан Карсыбаев – Big Sky Capital тең құрылтайшысы және басқарушы серіктесі, Hero Journey, Pippin Title, KeyCaliber, HBS Alumni Angels директорлар кеңестерінің мүшесі.
• Мурат Абдрахманов – Венчурлік инвестор (портфелінде 40-тан астам жоба), 30 жылдық тәжірибесі бар кәсіпкер. ҚР-дағы ең ірі телекоммуникациялық компаниялардың бірі «ASTEL» АҚ-ның, сондай-ақ Dent-Lux және Ambassador клиникалар желілерінің негізін қалаушы.
• Алдияр Исаков – TESS CBA DMCC Private Equity Fund инвестициялық директоры
• Павел Коктышев – Кәсіпкер және венчурлік инвестор, Most Ventures басқарушы серіктесі. Қазақстандық инновациялық экожүйенің басты сәулетшілерінің бірі. Startup School KZ курсының авторы, AIFC Басқарма төрағасының бұрынғы орынбасары.
• Сардор Алланазаров – Aloqa Ventures венчурлік аналитигі

Қазылар алқасының осы мүшелері жеңімпаздарды таңдады:

• 3-орын – CEVF-ке билеттер. QazTracker – идеяны жұмыс істейтін қаржылық-сақтандыру құралына айналдырған стартап.
• 2-орын – ER10 Media-да 500 мың теңге сомасына жарияланым орналастыру. Imediator – Қазақстан азаматтарына 300 000 000 теңгеден астам сомаға қарыздарды қайта құрылымдауға көмектескен стартап

— Бірінші орынды кім алатынын өте ұзақ талқыладық, пікірталас оңай болмады. Бізде екі фаворит болды, әділдік салтанат құруы үшін не істеу керегін ойладық. Бірақ кейін Мурат Абдрахманов: «Тағы бір бірінші орын берейік», — деді. Сондықтан бір миллионды Activat VC, ал екіншісін Мурат Абдрахманов бөледі, — деп жариялады Мейржан Есимханов.

— Бүгін керемет баттл болды, жобалардың сапасы мені таңғалдырды. Барлығы өте мықты болды, қазылар алқасының алдында аса ауыр міндет тұрды. Нашар жобалар мүлдем болған жоқ. Ал біз үздіктерді үздіктермен салыстыра бастағанда (бұл өте қиын), қазылар алқасы екі бірінші орын беруді шешті, — деп қосты венчурлік инвестор Мурат Абдрахманов және бірінші орын иелерін жариялады.

Clash of Startups 2.0-де бірінші орынды және бір-бір миллион теңгеден жеңіп алғандар:

• baraiq — қаржы индустриясында 15 жылдық тәжірибесі бар, Қазақстан Ұлттық Банкінің Антифрод-орталығының идеясын ұсынып, оны әзірлеген сериялық IT-кәсіпкер негізін қалаған стартап.
• KOZ AI — сыртқы инвестициясыз бизнеске арналған цифрлық шешімдер экожүйесін құрған, Қазақстанның ең ірі холдингтері мен Ұлыбритания компаниялары үшін 20+ жобаны жүзеге асырған стартап.

Жеңімпаздарды құттықтаймыз! Марапаттаудан кейін кештің бейресми бөлімі басталды: жағымды музыка аясында стартапшылар, инвесторлар және финтех өкілдері әңгімелесіп, тәжірибе алмасты және болашақ ынтымақтастықтың жоспарын құрды.

Фотоесепті сілтеме бойынша қараңыз.

Дереккөз: https://er10.kz/read/analitika/clash-of-startups-2-0-samaja-zharkaja-bitva-v-fintehe/