2024 жылғы стартаптарға арналған 11 идея. Табысты кейстер мен перспективалы бағыттар
Стартап – бұл ең алдымен идея. Бизнестің, жеке адамның немесе бүкіл қоғамның мәселелеріне шешім ұсынатын жақсы идеясыз сұранысқа ие өнім жасау мүмкін емес. Ал онсыз инвесторлардың назарын аудару да, сервисті шын мәнінде танымал ету де мүмкін болмайды. 2024 жылы идеяны қалай таңдау керектігін және 2023 жылы қандай стартаптар трендте болғанын айтып береміз.
Мазмұны:
- Стартаптың бағытын қалай анықтауға болады?
- «Жұлдызы жанған» жобалар
- Стартаптардағы өсіп келе жатқан бағыттар
Стартаптың бағытын қалай анықтауға болады?
Әдетте стартапты құрған кезде қалыптасқан идея бар болады. Ал егер ол болмаса, не істеу керек? Стартаптың қай бағытта жұмыс істеп, дамитынын бірнеше қарапайым қадамның көмегімен анықтауға болады.
Біріншіден, өзіңізді шынымен қызықтыратын, жұмыс істегіңіз келетін және бұрыннан дағдыңыз бен біліміңіз бар бизнес салаларының тізімін жасаңыз – осылай жұмыс істеу оңайырақ болады. Екіншіден, қазіргі нарықты зерттеңіз – осылайша сұраныс бар әрі жақсартулар мен инновациялар енгізуге мүмкіндік бар салаларды табуға болады. Үшіншіден, нарықтың мәселелері мен қажеттіліктеріне назар аударыңыз – бұрыннан бар мәселелердің шешімі табысқа жетудің кілті болуы мүмкін.
Сондай-ақ трендтер мен инновацияларды қадағалап отырыңыз. Ұсынылып қойған, бірақ әлі де жетілдіруді қажет ететін жаңа идеялар стартап үшін жақсы негіз бола алады. Нарықтың әлеуетін де ұмытпаған жөн – идея қазіргі технологиялар мен ресурстар арқылы жүзеге асырылатындай болуы әрі болашақта сұранысқа ие болуы керек. Онсыз бизнес құру мүмкін болмайды.
«Жұлдызы жанған» жобалар
Бастапқы кезеңде стартапқа айналып қана қоймай, инвесторлардан қаржыландыру алып жатқан, яғни бизнес-әлеуеті бар идеяларға шолу жасау жақсы қолдау бола алады. Төменде бір қарағанда қарапайым идеялардан басталып, «жұлдызы жанған» жобалардың бірнеше мысалы келтірілген.
Сингапурлық Oddle компаниясы
Сингапурлық Oddle компаниясы 9,7 млн доллар қаржыландыру алды. Бұл – тамақтану орындарына алып кетуге арналған тапсырыстарды және оларды жеткізуді өз онлайн-арнасы арқылы басқаруға мүмкіндік беретін e-commerce саласындағы бұлттық сервис. Стартап өнімділікті арттыруға арналған қолжетімді шешімдер ұсынады, олар ең аз шығынмен барынша көп пайда табуға көмектеседі.
Табыстың сыры – тамақ жеткізуге берілетін онлайн-тапсырыстарға сұраныстың жылдам өсуіне түрткі болған COVID-19 пандемиясында. Соның арқасында Oddle-дің сату көлемі 2019 жылғы 30 млн доллардан 2021 жылы 200 млн долларға дейін өсті. Бүгінде Oddle онлайн-тапсырыс платформасын жеті елдегі 1,5 мыңнан астам қоғамдық тамақтану орны пайдаланады.
Израильдік Perimeter 81
Израильдік Perimeter 81 компаниясы 165 млн доллар қаржыландыру алды. Компания желілік қауіпсіздік бойынша өз шешімін әзірлеп, оны аутсорс ретінде сата бастады. Бұл – компанияларға штаттағы қызметкерлер үшін ғана емес, қашықтан жұмыс істейтіндер үшін де бұлттық ортаға, бағдарламалар мен сервистерге қорғалған қол жеткізуді қамтамасыз ететін бұлттық VPN-платформа.
АҚШ-тағы Bakkt стартапы
АҚШ-тағы Bakkt стартапы жалпы сомасы 932,5 млн доллар қаржыландыру алды. Компания fintech саласында жұмыс істейді, ал оны құрудың басты мақсаты – криптовалюталарды танымал ету және қаржының осы секторына әлемдік компаниялардан ірі инвесторларды тарту болды. Сервис – криптовалютамен сауда жасауға және оны сақтауға, цифрлық активтермен есеп айырысу операцияларын жүргізуге мүмкіндік беретін цифрлық қаржылық экожүйе.
Австралиялық Linktree
Австралиялық Linktree компаниясы 165,7 млн доллар қаржыландыру алды. Бұл – мультисілтемелер жасауға арналған сервис. Стартаптың идеясы – инфлюенсерлер мен контент жасаушыларға өз контентін әртүрлі ресурстарда бір сілтеме арқылы екі-ақ рет басып бөлісуге көмектесу.
Финляндиялық Oura Health Oy
Тағы бір мысал – финляндиялық Oura Health Oy. Стартап 148,3 млн доллар инвестиция тартты және medtech саласында жұмыс істейді. Ол «Oura Ring» – ұйқы сапасын және ағзаның басқа да көрсеткіштерін қадағалайтын, титан қорытпасынан жасалған «ақылды» сақинаның арқасында танымал болды. Сақинаның артықшылығы – өлшемінде: смарт-сағат сияқты басқа осындай құрылғылардан айырмашылығы, ол ықшам әрі көзге түспейді.
Бұл бес мысал стартап командалары бұрыннан бар және сатылып жүрген идеяларды алып, оларға жаңаша қарай білгенін және соның арқасында нарықтағы өз үлесін жаулап алғанын көрсетеді. Мұндай тәсіл сізге де нәтиже беруі мүмкін.
Стартаптардағы өсіп келе жатқан бағыттар
Стартаптар өз нишасын тауып, жұмыс бастай алатын түсінікті әрі перспективалы бағыттардың тізімі қазірдің өзінде бар. Төменде идеяны қалыптастыруға көмектесетін осы бағыттар мен қолдану салалары берілген.
Біріншісі – жасанды интеллект және машиналық оқыту. Бұл технологияларды денсаулық сақтау, қаржы, өндіріс, маркетинг және басқа да салаларда қолдануға болады. Негізгі трендтер – автономды жүйелерді дамыту, инновациялық оқыту алгоритмдерін жасау және табиғи тілді өңдеу алгоритмдерін жетілдіру.
Екіншісі – пилотсыз технологиялар. Қолдану саласы – көлік, логистика және ауыл шаруашылығы. Ал сарапшылар трендтер ретінде жүргізушісіз автомобильдерді, пилотсыз жүк көліктерін және коммерциялық мақсатта пайдаланылатын дрондарды дамытуды атайды.
Үшіншісі – криптовалюталар және блокчейн технологиясы. Оларды қаржыда да, логистикада және цифрлық келісімшарттар саласында да қолданады. Орталықсыздандырылған қаржыны дамыту және деректердің ашықтығы мен қауіпсіздігін қамтамасыз ету үшін блокчейнді пайдалану негізгі трендтер болып саналады.
Төртіншісі – кәсіпорындарды цифрлық трансформациялау. Бұл қолданыстағы бизнес-процестерді оңтайландыру да, оларды өзгерту үшін цифрлық технологияларды енгізу де болуы мүмкін. Негізгі трендтер бұлттық технологияларды, деректер аналитикасын және заттар интернетін (IoT) пайдалану төңірегінде қалыптасады.
Бесіншісі – қаржылық технологиялар немесе финтех (FinTech). Олардың қолдану аясы кең – электрондық төлемдер, несиелеу және инвестициялар. Идея іздеуге пайдалы трендтер – цифрлық банктерді дамыту және қаржыда блокчейн технологиясын пайдалану.
Алтыншысы – денсаулық сақтау немесе медтех (MedTech). Мұндай технологиялардың қолдану саласы – телемедицина, медициналық технологиялар және денсаулықты басқару. Ал негізгі трендтер пациенттерді қашықтан бақылауға арналған технологияларды дамыту және диагностика мен емдеу үшін ЖИ-ді пайдалану төңірегінде шоғырланған.
Жетіншісі – білім беру (EdTech). Бұл бағыт бұрыннан бар, стартаптар цифрлық оқыту, адаптивті технологиялар және білім беру платформаларын жасау бойынша жұмыс істейді. Жалғасып келе жатқан негізгі тренд – онлайн-білім беруді дамыту және дербестендірілген білім беру бағдарламаларын енгізу.
Сегізіншісі – қалдықтарды қайта өңдеу. Экологияға төнген қауіппен күрестегі трендтер тиімді қайта өңдеу технологияларын әзірлеуге және қалдықтарды жаңа әдістермен жоюға саяды.
Тоғызыншысы – смарт-офистер мен коворкингтер. Иә, стартаптар технологияларды жасап қана қоймай, басқаларға да оларды жасауға көмектеседі. Мысалы, өз дағдыларыңызды жұмыс кеңістіктерін ұйымдастыруда және офистерді басқаруда қолдануға болады. Мұндағы технологиялар өнімділікті арттыру, офистердің жайлылығы мен қауіпсіздігін жақсарту бағыттарында дамып келеді.
Оныншысы – маркетинг пен сатуда қажет лидогенерация. Мұнда әлеуетті клиенттерді тиімді іздестіру және тарту үшін деректер мен алгоритмдерді пайдалану технологияларын ұсынуға болады.
Он біріншісі – эко-өнімдер. Түрлендірілген тағамнан бас тарту тренді барған сайын күшейіп келеді. Осы трендтерге ілесіп, өнімдердің тұрақтылығы мен экологиялық қауіпсіздігіне бағытталған технологияларды дамытумен айналысуға болады.
Бұл негізгі трендтер 2024 жылы стартаптар саласында басым болады және жаңа идеялар ұсына алатындарға өз ісін бастауға және, мүмкін, табысқа жетуге мүмкіндік береді.
